ХЗДХ-ийн сайд мөрдөн байцаагч, тэртусмаа шүүх бүүр ч биш

"Хүн засагладаг биш хууль засагладаг болно" хэмээн Ерөнхийлөгч У.Хүрэлсүхийн хэлсэн үг өнөөдөр яг эсрэгээрээ хүн засагладаг болсныг Ерөнхий сайдын томилгоо баталсан. Ардчиллыг дээдэлдэг, хууль мэддэг хүн бүр хуулийн сайдын томилгоонд үнэхээр гайхаж бас эгдүүцэн хүлээн авч байна.

Ардчиллын “алтан хараацай” Э.Бат-Үүл “МАН хоорондоо алалцахдаа ардчиллыг устгахыг хэрхэвч зөвшөөрч болохгүй!” хэмээн жиргэжээ.  Үнэн юм.
“Өш хонзонгийн” томилгоо хэмээн нэрлэгдсэн Ерөнхий сайдын энэ шийдвэр бол өрсөлдөгчөө “яллан” буулгаж авах гэсэн улс төрийн зорилготой. Энэ нь анхнаасаа тодорхой байсан.  Өөрөө ч ард түмэнд хандсан мэдэгдэлдээ Д.Амарбаясгаланг нүүрсний хэрэгт холбогдсон хэмээн мэдэгдсэн нь ардчиллын үнэт зарчмаас гадна Үндсэн хуулийн үндэсний эв нэгдлийг хангах, хууль дээдлэх үндсэн зарчмыг бүдүүлгээр зөрчсөн юм. Ялангуяа Үндсэн хуулийн 16/14 буюу “Гэм буруутай нь хуулийн дагуу шүүхээр нотлогдох хүртэл хэнийг ч гэмт хэрэг үйлдсэн гэм буруутайд тооцож үл болно. Гэм буруутны ял зэмлэлийг түүний гэр бүлийн гишүүд, төрөл саданд нь халдаан хэрэглэхийг хориглоно” гэсэн Хүний эрх, эрх чөлөөтэй холбоотой бүхэл бүтэн бүлгийн хэд хэдэн заалтыг ноцтой зөрчжээ.
Улс төрийн өрсөлдөгчөө буулгаж авахын тулд ХЗДХ-ийн сайдыг тодорхой үүрэг даавгавар, чиглэлтэйгээр томилж буй нь хуулийн бүх эрх мэдэл, хүчийг дайчилж нэг зүгт чиглүүлээрэй гэсэн үг болж байна.
Шударга ёс, нүүрсний хулгайтай тэмцэхийн тулд бүхэл бүтэн хууль хүчний салбарыг дайчилна гэдэг юу гэсэн үг вэ? Монгол Улсад энээс өөр гэмт хэрэг байхгүй, байсан ч битгий тоо гэсэн үг үү?
ХЗДХ-ийн яаманд ЦЕГ, Хил хамгаалах ерөнхий газар, Шүүхийн шийдвэр гүйцэтгэх ерөнхий газар гэсэн нийт 14 байгууллага харьяалагддаг. Үүнээс ЦЕГ-т нь Мөрдөн байцаах алба, Эрүүгийн цагдаагийн газар гээд тус тусын үүрэг чиглэл бүхий хууль хүчнийхэн шууд тушаалаар үүрэг гүйцэтгэдэг.
Үүнээс үзвэл ХЗДХ-ийн “сайд” Б.Энхбаяр ЦЕГ-ын даргад “нүүрсний хулгайч” тэр тэрийг ясыг нь цайтал шалгаад, эрүүдэн шүүгээд ч хамаагүй хэргийг нь хүлээлгэ гэдэг тушаал өгч Ерөнхий сайдынхаа даалгаврыг биелүүлэх үү?!
Ийм байдалд хүрвэл энэ улсад маань юу болох вэ? Юун шударга ёс!!! Жинхэнэ утгаараа улс төрийн хэлмэгдүүлэлт явагдах нь.
Ерөнхий сайдын ухаанаа алдсан хувийн эрх ашгаас болж МАН-ын зодоон хууль хүчнийхний хэлмэгдүүлэлтээр үргэлжлэх нь хэнд хэрэгтэй юм бэ?
Ерөнхий сайд аа, ХЗДХ-ийн сайд бол цагдаа, мөрдөн байцаагч, эрүүгийн төлөөлөгч, шийдвэр гүйцэтгэгч биш ээ. Тэртусмаа Үндсэн хуульд заасанчилан хэн нэгнийг гэм буруутайг нотолдог шүүх бүүр ч биш юм.
Тиймээс ардчилсан Монголын түүхэнд, тэртусмаа улс төрийн түүхэнд гарч байгаагүй Ерөнхий сайдын “амиа бодсон” шийдвэрийг эрүүл ухаантай хүн хүлээж авах аргагүй ээ. Эсвэл УИХ бүрэн эрхийнхээ хүрээнд үндэсний эв нэгдэл, ардчиллын үнэт зарчмынхаа төлөө улстөржилгүйгээр нэгдэж Ерөнхий сайдыг огцруулахаар өөр гарц үлдсэнгүй бололтой