БАЯНГОЛ ДҮҮРГИЙН 60 ЖИЛИЙН ОЙД ЗОРИУЛСАН ГАР ЗУРГИЙН УРАЛДААНД ОРОЛЦСОН ХҮҮХДҮҮДЭД ТАЛАРХАЛ ИЛЭРХИЙЛЛЭЭ

Баянгол дүүрэг үүсэн байгуулагдсаны түүхт 60 жилийн ой энэ онд тохиож байна. Ойн хүрээнд дүүргийн Хөдөлмөр, халамжийн үйлчилгээний хэлтэс ЗДТГ-тай хамтран удахгүй болох Олон улсын Хүүхдийн эрхийг хамгаалах өдрийг тохиолдуулан 3-15 настай хүүхдүүдийн дунд гар зургийн уралдаан зохион байгуулсан бөгөөд уралдаанд оролцсон хүүхдүүдийг өнөөдөр дүүргийн Засаг дарга Ө.Сумъяабаатар, Нийгмийн хөгжлийн хэлтсийн дарга З.Балдандугар, дүүргийн Хөдөлмөр, халамжийн үйлчилгээний хэлтсийн дарга Г.Батбаяр нар хүлээн авч уулзан баяр хүргэлээ.

Энэхүү уралдааныг:

3-8 насны ангилалд “Миний хүсэл, мөрөөдөл”,

9-15 насны ангилалд “Манай дүүрэг миний ирээдүй” сэдвийн хүрээнд зохион байгуулсан бөгөөд Ерөнхий боловсролын 70-р тусгай сургуульд суралцдаг Баянгол дүүргийн 34 хорооны 112 хүүхэд 124 бүтээл ирүүлснээс 2 насны ангилалд шагналт байранд 6, тусгай байранд 4 хүүхэд шалгарсан байна.

Уулзалтын үеэр дүүргийн Засаг дарга Ө.Сумъяабаатар уралдаанд идэвхтэй оролцсон нийт хүүхдүүддээ, үргэлж дэмжиж байдаг аав ээж, асран хамгаалагч нарт нь баяр хүргэж талархал илэрхийлсэн юм.

Мөн уралдаанд оролцсон бүх хүүхдийн зурсан зургийг эмхтгэн цомог болгон гаргасан бөгөөд бүтээлийг нь гардуулж өгөв.