Д.Мөнх-Эрдэнэ АН-ынхаа булхай, луйврыг дэлгэв

АН-ынхан сонгуульд оролцож, өрсөлдөгч байж чадах эсэх нь  улам бүр эргэлзээтэй болсоор байна. Энэ нь тэднээс өөрсдөөс нь  бүрэн хамаарч байгаа бөгөөд УИХ-д нэр дэвшигчдээ тодруулах ҮБХ-ны хуралдаан нь  хэрхэн “нохойн наадам”  болсныг намынх нь нөхөд ээлж дараалан илчилсээр байна.  

Тэр бүү хэл, нэр дэвшигчдийг тодруулах Сонгон шалгаруулах хороогоо хуралдуулаагүй, хорооны гишүүдийн саналыг авалгүйгээр нэр дэвшигчдийн жагсаалтыг хүчээр баталсан гэдгийг лайвчин Д.Мөнх-Эрдэнэ илчилж орхив.

Түүний хувьд нэр дэвшигчдийг Сонгон шалгаруулах хорооны гишүүнээр ажилласан ч түүнээс ямар нэгэн санал асуугаагүй бөгөөд хороог хуралдаагүй байна. Тодруулбал, тэрбээр энэ тухайд “Сонгуульд нэр дэвшигчдийг тодруулах Сонгон шалгаруулах хороо хуралдаагүй. Тойрогт нэр дэвшигчдийн талаар худлаа үнэн ярьж байгаад шууд нэрс зарласан. Цаг дуусахаас бараг 10 минутын өмнө  Л.Гантөмөр, Э.Одбаяр хоёр орж ирээд  жагсаасан нэрсээ уншчихаад гараад явчихсан. Сонгон шалгаруулах хорооны гишүүн надаас  жагсаалтын нэрсийн талаар  ямар нэгэн санал асуугаагүй” гэлээ.

Д.Мөнх-Эрдэнийн хувьд  намынхаа байранд  орох гэсэн боловч “Оруулж болохгүй” гэх чиглэлийг дарга нарынх нь зүгээс хамгаалалтынханд өгсөн учраас нэвтэрч чадаагүй юм. Ийнхүү  намдаа гомдсон гомдол нь ҮБХ-ны хурал төдийгүй, нэр дэвшигчдийг тодруулах Сонгон шалгаруулах хорооны хуралдааны  булхай луйврыг илчлэхэд хүргэв бололтой.