Хөдөлмөрийн гавьяаны улаан тугийн одонт Баянзүрх дүүрэг боллоо

Өнөөдөр Баянзүрх дүүрэг үүсгэн байгуулагдсаны түүхт 60 жилийн ойн баярын хурал Нийслэлийн соёлын ордонд боллоо. Түүхт 60 жилийн ойгоороо Монгол Улсын Ерөнхийлөгчийн зарлигаар Баянзүрх дүүрэг нь “Хөдөлмөрийн гавьяаны улаан туг”-ийн одонгоор шагнууллаа.

Мөн эх орныхоо хөгжил, цэцэглэлтэд үнэтэй хувь нэмэр оруулсан иргэд төрийн дээд одон медалиар энгэрээ мялаасан юм. Баярын хуралд Улсын Их Хурлын гишүүд болон үе, үеийн гавьяат зүтгэлтнүүд, алдар нэртэй хүндтэй хүмүүс урилгаар оролцов.

1965 оны 4 дүгээр сарын 14-нд “Найрамдалын район” нэртэйгээр анх байгуулагдахдаа 30 гаруй мянган хүн ам, 20 хороотой байсан бол өдгөө 450 гаруй мянган иргэнтэй, 43 хороо, 122 мянган га газар нутгийг хамарсан нийслэлийн хамгийн их хүн амтай эрчимтэй хөгжиж буй дүүрэг юм.

Тус дүүрэг нь Туул, Улиастай, Сэлбэ голын сав дагуу оршдог бөгөөд эртнээс улбаатай нийслэлийн хамгийн их архелогийн дурсгалтай нутаг юм. Ардын армийн үед Маймаа хот хэмээн алдаршиж Жанжин Сүхбаатарын өлгий нутаг гэдгээрээ түүхэнд тэмдэглэгдсэн байдаг.

1960-1990-ээд онд үйлдвэр, орон сууц, төрийн үйлчилгээний байгууллагууд олноор төвлөрч, хот байгуулалтын суурь тавигдсан түүхтэй. Баянзүрх дүүрэг бол аж үйлдвэрийн ажилчдын хороолол, цэргийн район гэдгээрээ нийслэлдээ онцлог бүхий дүүрэг билээ.

 “Баянзүрх дүүргийн хөгжлийн зураглал 2030” бодлогын баримт бичгийг 2022 онд боловсруулж байгальд ээлтэй, тогтвортой хөгжлийг төлөвшүүлж, цогц хот төлөвлөлттэй, ухаалаг дэд бүтцэд суурилсан орчныг бүрдүүлэхийг зорьж байна. Иргэдийн оролцоонд тулгуурласан, ил тод, хариуцлагатай засаглал бол энэхүү хөгжлийн бодлогын тулгуур зарчим юм.

Сүүлийн жилүүдэд хийгдсэн томоохон бүтээн байгуулалтаас дурдвал 66 км авто зам, 14,500 гэрэлтүүлэг, 535 ухаалаг камер, 13.6 км дугуйн зам, хүүхдийн тоглоомын талбай, амралтын талбай, 3х3 спорт талбай, цэцэрлэгт хүрээлэн зэрэг 106 шинэ талбайн бүтээн байгуулалтын ажил амжилттай хийгдлээ.

Баянзүрх дүүрэгт хийгдэх онцлох бүтээн байгуулалтаас дурдвал 20 мянган хүн хүлээж авах чадалтай “Олон улсын эко цэцэрлэгт хүрээлэн”, 42 га талбайд иж бүрэн спорт, ногоон байгууламжтай бүс болох “Дарь-Эх цогцолбор”, “Экстрем талбай”, “Бидний гудамж”, “Кино урлагийн гудамж” зэрэг залуус, гэр бүлд чиглэсэн бүтээлч орчин бий болгоход анхаарч ажиллаж байна.

Цаашид, Улаанбаатар хотод хэрэгжих 24 мега төслөөс тус дүүрэгт 5 төсөл хэрэгжих юм. Тодруулбал, Улаанбаатар метро, Тойрог зам, Туулын хурдны зам, Хог шатааж эрчим хүч үйлдвэрлэх төсөл,  Тархмал эх үүсвэр төсөл ажил хэрэг болж иргэдийн эрүүл аюулгүй орчинд амьдрах нөхцөл бүрдэхийн сацуу эдийн засгийн хүртээмжийг нэмэгдүүлж иргэн, аж ахуй нэгж байгууллагуудад ээлтэй дүүрэг болон өргөжин тэлэх юм.