“ӨГЧ ЧАДДАГ СЭТГЭЛ” САЙН ДУРЫН ХҮМҮҮНЛЭГИЙН АЯНД ХҮҮХДҮҮД НЭГДЛЭЭ

Баянгол дүүргийн Хүүхэд, залуучуудын соёлын ордон нь дүүргийн төрийн болон хувийн хэвшлийн ерөнхий боловсролын сургуулиудын сурагчдын дунд сайн дурын оролцоог дэмжих, нийгмийн хариуцлагыг ухамсарлуулах, бусдад туслах сэтгэл төлөвшүүлэх зорилгоор “Өгч чаддаг сэтгэл” хүмүүнлэгийн олон талт ажлыг эхлүүлж, дүүргийн “Шинэ Эхлэл” болон “Шинэ Эрин” сургуулиудтай хамтран ажиллалаа.

Тус 2 сургуулийн сурагчдын мэдлэг чадварыг дугуйлангийн сурагчдад нэвтрүүлэх зорилгоор “Бусдад туслах нь өөрт минь урам зориг өгдөг” уриатайгаар Англи хэлний сургалтын танхимын дэргэд “English speaking club” нээж, 2 сарын турш ярианы сургалтыг амжилттай зохион байгууллаа. Байгууллагаас санаачилсан энэхүү ажил нь нийгэмд эерэг хандлага түгээхээс гадна ирээдүйн ухамсарт иргэнийг төлөвшүүлэхэд чухал алхам болно хэмээн үзэж байна. Мөн тус хүмүүнлэгийн ажлын хүрээнд өнөөдөр буюу 2025 оны 05 дугаар сарын 27-ны өдөр Хүүхэд, залуучуудын соёлын ордны дарга С.Мөнхзаяа тус 2 сургуулийн Сайн дурын ажил эрхэлсэн сурагчдад “Батламж” гардуулах арга хэмжээг зохион байгуулсан ба ирэх хичээлийн жилд тухайн сургуулиудтай илүү өргөн хүрээнд хамтран ажиллахаар санал солилцлоо. 
Дашрамд дурдахад Баянгол дүүргийн Хүүхэд, залуучуудын соёлын ордон нь 2024- 2025 оны хичээлийн жилд боловсрол, соёл урлаг, спортын чиглэлээр нийт 14 төрлийн дугуйланд 1,200 гаруй хүүхдийг хамруулаад байна.

Энэхүү ажлыг зохион байгуулсанаар сургуулийн хамт олон болон эцэг эх, олон нийтийн талархлыг хүлээж байна.