БГД: ХӨГЖЛИЙН БЭРХШЭЭЛТЭЙ ИРГЭДЭД ЗОРИУЛСАН ӨДӨРЛӨГ БОЛЖ БАЙНА

Баянгол дүүргийн 60 жилийн ой энэ онд тохиож байгаа. Ойн хүрээнд нийгмийн салбар бүрд чиглэсэн олон ажил, арга хэмжээ зохион байгуулахаар төлөвлөсөн. Үүний нэг нь дүүрэгт оршин суудаг хөгжлийн бэрхшээлтэй иргэдийн эрхийг хамгаалах, дэмжих, цаашид хамтран ажиллах арга хэмжээний хүрээнд “Нээлттэй хаалганы өдөрлөг”-ийг дүүргийн 14-р хороо “Байгаль эх цогцолбор”-ын гадна талбайд #яг_одоо зохион байгуулж байна.

Тус дүүрэгт холбогдох хууль тогтоомжийн хүрээнд хөдөлмөрийн чадвар алдагдалтай гэж бүртгэгдсэн 5500 гаруй даатгуулагч иргэн бий. Тэгвэл эдгээр оршин суугчид маань өнөөдөр “Нээлттэй хаалганы өдөрлөг”-т оролцож Эрүүл мэндийн магадлалын зөвлөлийн үеэр иргэдэд тохиолддог асуудлуудыг хэрхэн шийдвэрлэх, гаргаж болзошгүй алдаа дутагдлаас яаж урьдчилан сэргийлэх, хөгжлийн бэрхшээлтэй иргэний даатгуулагчийн эрхийг хамгаалах, эрүүл мэндийг нөхөн сэргээх болон хөгжлийн бэрхшээлтэй иргэдэд зориулсан нийгмийн үйлчилгээг хаанаас авч болох гээд олон чиглэлээр асуудал хариуцсан алба хаагчдаас зөвлөгөө мэдээлэл авч байна.

Нээлттэй хаалганы өдөрлөгийг дүүргийн Нийгмийн даатгалын газар, Эрүүл мэндийн төв, Хөдөлмөр, халамж үйлчилгээний хэлтэс хамтран зохион байгуулж буй бөгөөд өнөөдөр 17:00 цаг хүртэл үргэлжилнэ.