Ж.Чинбүрэн: Хүүхдийг зам тээврийн осолд өртөхөөс хамгаалсан хууль эрх зүйн орчныг бүрдүүлнэ

УИХ-ын гишүүн Ж.Чинбүрэнгийн санаачилгаар Хүүхдийг зам тээврийн осолд өртөхөөс урьдчилан сэргийлэх чиглэлээр ажиллах, дэмжих бүлэг УИХ-д байгуулагдлаа.

Энэ талаар Ж.Чинбүрэн гишүүн  “Хүүхдийг зам тээврийн осолд өртөхөөс урьдчилан сэргийлэх, аюулаас хамгаалах орчин нөхцөлийг бүрдүүлсэн тогтолцоог бий болгох хууль санаачлан, батлуулах, эрх зүйн орчныг боловсронгуй болгох чиглэлээр ажиллах дэмжих бүлэг УИХ-д байгуулагдаж байна. Энэхүү дэмжих бүлэгт одоогоор 32 гишүүн гарын үсэг зурлаа” хэмээн мэдээллээ. Эдгээр  гишүүд нэгдэн хүүхдийг  зам тээврийн осолд өртөхөөс хамгаалсан хуулийн төслийг боловсруулж, УИХ-д өргөн барина гэдгийг хэллээ. Түүнчлэн хүүхдүүд зам тээврийн осолд өртөхөөс урьдчилан сэргийлэх, хамгаалах чиглэлээр долоон төрлийн ажлыг хийхээр төлөвлөсөн бөгөөд ийнхүү эхлүүлж буйгаа дуулгалаа.

Түүний мэдээлснээр улсын хэмжээнд сүүлийн 2018-2023 оны таван жилийн байдлаар 118.908 зам тээврийн осол бүртгэгдэж, 6.468 хун хунд, хөнгөн гэмтэж, 1.298 хун нас барснаас 260 хүүхэд эндсэн бол 2024 оны байдлаар 30.977 зам тээврийн осол бүртгэгдэж, 2520 хүн хүнд, хөнгөн гэмтэж,631 хүн нас барснаас 69 хүүхэд эндсэн гэх тоон мэдээллийг хуваалцлаа. Ерөнхий ослын шалтгаан нөхцөлийг авч үзвэл эцэг эх, асран хамгаалагчид хүүхдийг автомашинд тээвэрлэхдээ зориулалтын хамгаалалтын суудал, хамгаалах бус хэрэглэдэггүй, буруу тээвэрлэдэг, орон нутгийн замд хурд хэтрүүлдэг, дүрэм зөрчдөг, хүүхдүүд гарцгүй газраар зам хөндлөн гарах, ойртон ирж байгаа тээврийн хэрэгсэл урдуур гэнэт гуйх, замын зорчих хэсэг болон ойролцоо тоглох, сургууль, цэцэрлэгийн орчин нь стандартын дагуу тохижуулагдаагүй, бага насны хүүхдийг харгалзах хүнгүй хөдөлгөөнд оролцуулдаг, хүүхэдтэйгээ хамт явж байхдаа замын хөдөлгөөний талаар зөв үлгэр дуурайлал үзүүлдэггүй, хүүхдүүд замын хөдөлгөөний дүрмийн мэдлэгтэй байх боловч дадал суугаагүй, жолооч нар замын хөдөлгөөний дүрмээ биелүүлдэггүй зэрэг нь осолд өртөх нөхцөлийг бүрдүүлж байгаа аж.