АН: Малчдыг дэмжихгүй

АН-ынхан “Малчин өрхөд хөнгөлттэй зээл олгох,  тэднийг чинээлэг болгохыг  дэмжихгүй” гэдгээ зарим хуульч, эдийн засагчдаараа дамжуулан зарлалаа.

Тодруулбал,  хуульч Х.Номингэрэл, эдийн засагч М.Чимэддорж нарын зүгээс  Уламжлалт мал аж ахуйд тулгамдаж буй байгаль, цаг уурын өөрчлөлтөөс шалтгаалсан сөрөг нөлөөллийг бууруулах тухай хуулийг эсэргүүцэн хэвлэлийн бага хурал хийлээ.

Тэдний хувьд уг хуулийн хүрээнд “Малчдад бага хүүтэй зээл олгож байгаа нь төсвийн мөнгийг үргүй зарцуулж байгаа хэлбэр” хэмээн тодорхойллоо. Гэтэл уг хуулийн хүрээнд Засгийн газраас “Шинэ хоршоо” хөдөлгөөн өрнүүлнэ. Хоршоонд сайн дураар нэгдсэн малчин өрх арилжааны банкнаас 3-5 жилийн хугацаатай, жилийн 6 хувийн хүүтэй хөрөнгө оруулалтын чиглэлийн 50 хүртэлх сая төгрөгийн зээлийг авах эрхтэй болно. 

Улмаар чинээлэг малчин өрх бий болж, сарын орлого нь 5 сая төгрөгт хүрэх боломж бүрдүүлэх үндсэн зорилготойгоор уг хуулийг УИХ-аас баталсан. Гэвч АН-ыханд энэ хууль таалагдсангүй, малчдыг чинээлэг болгохыг дэмжихгүй гэдгээ баталгаажуулан зарлав. Бодит байдалд 2023-2024 оны зуднаар  улсын хэмжээнд 7.4 орчим сая мал хорогдсон,  5000 малчин малынхаа 70-аас дээш хувийг алдсан дүн мэдээ гарчихаад байгаа юм. Тийм ч учраас малчдад учирч буй эрсдэл, бэрхшээлээс тэднийг хамгаалах, амьжиргааг нь дэмжих зорилготойгоор анхдагч хуулийг батлан хэрэгжүүлж эхэлснийг АН-ынхан ийнхүү эсэргүүцэж эхэллээ.