“Шинэ хоршоо” хөдөлгөөний хойд бүсийн нээлт Орхон аймагт эхэллээ

Хойд бүсийн “Шинэ хоршоо” хөдөлгөөний нээлт Орхон аймагт болж байна. Нээлтэд Хөвсгөл, Булган аймгийн болон Орхон аймгийн малчин, хоршооны төлөөлөл хүрэлцэн иржээ. Монгол Улсын сайд, ЗГХЭГ-ын дарга Д.Амарбаясгалан хойд бүсийн арга хэмжээг нээж үг хэллээ.

Түүний хувьд “Шинэ хоршоо” хөдөлгөөн болон гурил, тэжээлийн үнийн хөөсийг буулгах шийдлийн санаачилсан юм. Энэ үеэр тэрбээр “Засгийн газар бүс нутагт нь очиж, “Шинэ хоршоо” хөдөлгөөний талаар мэдээлэл хүргүүлж байна. Мал аж ахуйн салбарт томоохон бодлогын дэмжлэг үзүүлэхгүйгээр газар нутгаа эзэнтэй байлгах бодлогыг хэрэгжүүлж чадахгүй юм байна гэсэн судалгаа гарсан”. Тиймээс малчдад зориулсан анхдагч хуулийг санаачилсан гэдгээ тодотгож байв.

Орхон аймгийн Жаргалант суманд “Шинэ хоршоо” хөдөлгөөний “Малчдад туслах үйлчилгээний цэг”-ийг өнөөдөр нээжээ. Энэ нь шинэ хоршоо хөдөлгөөний талаар малчдад мэдээлэл, заавар зөвлөгөө өгөх анхны цэг болж байна. Жаргалант сумын хувьд Орхон аймагтаа малчдын тоогоороо тэргүүлдэг. Тиймээс “Шинэ хоршоо” хөдөлгөөний талаар мэдээлэл авах хүсэлтэй малчдын тоо олон байна. Хөдөө аж ахуй, газар тариалан хосолсон уг суманд “Шинэ хоршоо” хөдөлгөөнд нэгдэж, үйлдвэрлэл явуулах олон боломж байгаа юм.