Д.Амарбаясгалан: “Шинэ хоршоо”-ны хөрөнгө оруулалтын зээл 20 хоногийн хугацаанд гарна

“Нийслэлчүүд өдөр бүр шинэ мах, сүү, сүүн бүтээгдэхүүн хэрэглэдэг болно. Жилийн дөрвөн улирал нэг кг нь 15 мянган төгрөгийн махыг нийслэлчүүд хэрэглэвэл эдийн засаг тогтворжино. Түүнээс бус зун нь махны үнэ кг нь 15 мянган төгрөг, өвөл 23 мянган төгрөг болж болохгүй. Малчид нэмүү өртөг шингээсэн малын мах, бүтээгдэхүүнээ худалдаалвал амьдрал нь дээшилнэ. Үүний тулд Засгийн газар хөрөнгө оруулалтын зээл олгож байна.

Өнөөдөр 1000 малтай малчин 10-15 сая төгрөгийн өндөр хүүтэй зээлийг арилжааны банкнаас авч байна.  Тэгвэл хоршооны гишүүн малчин жилийн зургаан хувийн хүүтэй, 3-5 жилийн хугацаатай  зээлийг авна. Зээлийн батлан даалтын сан 80-100 хувь батлан даалт гаргана. Ингэснээр хоршооны гишүүд бие биедээ шаардлага тавьж, хариуцлагатай ажиллана. Энэ хөрөнгө оруулалтын зээлийг малчид олон төрлөөр ашиглаж, бизнес хийх боломжтой юм" гэдгийг Монгол Улсын сайд, ЗГХЭГ-ын дарга Д.Амарбаясгалан баруун бүсийн “Шинэ хоршоо” хөдөлгөөний нээлтэд танилцуулав.

Ховд аймагт зохион байгуулж байгаа баруун бүсийн “Шинэ хоршоо” хөдөлгөөний нээлтэд Баян-Өлгий, Говь-Алтай, Завхан, Ховд, Увс аймгийн 1200 гаруй малчин, хоршоо эрхлэгчдийн төлөөлөл оролцож байна.

 “Шинэ хоршоо” хөдөлгөөнөөр хоршооны малчид бүс нутгийн онцлогт тохирсон мал аж ахуй, газар тариалан, хөдөө аж ахуйн үйлдвэрлэлийг явуулах юм.

“Шинэ хоршоо” хөдөлгөөнөөр 5 га газрыг хоршоонд  төсөл сонгон шалгаруулалтаар 15 хоногийн хугацаанд олгоно. Өнөөдөр 330 суманд төрийн албан хаагч зөвлөн туслах үйлчилгээ үзүүлж байгаа. Хоршоо байгуулахад хоёр хоногийн хугацаа шаардагдана, 20 хоногийн дотор зээлээ авна. Хэрэгжих боломжтой зээлийг арилжааны банкууд олгоно. 2024 онд 600 гаруй тэрбум төгрөгийн зээлийг гаргахад арилжааны банкууд бэлэн болсон” гэдгийг ЗГХЭГ-ын дарга Д.Амарбаясгалан танилцуулахад малчид баяртайгаар хүлээж авч байлаа. Учир нь өмнө нь газар олголтын асуудал хуулиараа 100 гаруй хоногийн,  хоршоо байгуулахаар бичиг баримт бүрдүүлэхэд 30 хоногийн хугацаа шаардагддаг байжээ.

Засгийн газрын Шинэ сэргэлтийн зургаан бодлогод Хот, хөдөөгийн сэргэлтийг тусгасан. Тэгвэл “Шинэ хоршоо” хөдөлгөөнийг орон даяар өрнүүлснээр хөдөөгийн сэргэлт албан ёсоор хэрэгжиж байгаа юм.

“Шинэ хоршоо” хөдөлгөөнөөр хоршоог хэрхэн байгуулах, ямар бичиг баримт бүрдүүлэх, хөрөнгө оруулалтын зээлийг хэрхэн авах талаар холбогдох албаны хүмүүс Ховдод болж буй баруун бүсийн нээлтийн үеэр танилцуулж байна.