ЖДҮСанд 238.5 тэрбум төгрөгийн зээлийн хүсэлт бүртгүүлжээ

Жижиг, дунд үйлдвэрийн хөгжүүлэх сангаас олгох урт, хугацаатай хөнгөлөлттэй зээлийн хүсэлтийг 4 дүгээр сарын 20-ны өдрөөс 5 дугаар сарын 20-ний өдрийг хүртэл хугацаанд Улаанбаатар хотод COVID-19 вирусын тархалтын улмаас цахим системээр дамжуулан, орон нутагт цаасан хэлбэрээр хүлээн авах ажил хийгдэж дууссан байна.

Энэ жил ЖДҮСанд 1,576 төсөл хэрэгжүүлэгчийн 238.5 тэрбум төгрөгийн зээлийн хүсэлт бүртгүүлжээ.

Жижиг, дунд, бичил бизнес эрхлэгчдэд урт хугацаатай хөнгөлөлттэй зээл олгох үйл ажиллагааг ХХААХҮЯ,  ЖДҮХСангаас орон даяар зохион байгуулжээ. Энэ удаад ЖДҮХСангаас зээлийн эргэн төлөлтөөс татан төвлөрүүлсэн 50,4 тэрбум төгрөгийн хөнгөлөлттэй зээлийг олгох юм.

Тус сангаас 2020 онд олгох зээлийг “Covid-19” халдварын улмаас үүсээд буй нөхцөл байдалтай уялдуулан хүн амын хүнсний хангамжийн тогтвортой байдал, стратегийн хүнсний хэрэгцээг хангах, эрүүл мэндийг хамгаалах, халдваргүйтгэл ариутгалын нөөцийг нэмэгдүүлэх чиглэлийн бүтээгдэхүүн үйлдвэрлэлийг дэмжих юм.

Дэлхийн нийтээр тархсан COVID-19 вирусын улмаас энэ удаагийн төсөл сонгон шалгаруулалтыг анх удаа цахимаар хүлээн авч, зээлийн нэгдсэн систем дээр үүссэн хэт ачаалалыг бууруулах, хугацаанд нь илгээсэн төслийг хамруулах талаас зарим зохион байгуулалтын арга хэмжээг авч, алдаа гаргахгүй, бухимдал үүсгэхгүй байх талаас сангийн зүгээс анхаарч, ажиллажээ.