УИХ-ын хаврын чуулганыг цахимаар хуралдуулбал ХУУЛЬ зөрчинө

УИХ-ын хаврын ээлжит чуулганыг хуулийн дагуу ирэх сарын 6-нд эхлүүлнэ. Коронавирусийн цар тахал дэлхий дахиныг түгшээж, Монгол Улсад өндөржүүлсэн бэлэн байдал тогтоосонтой холбоотойгоор хаврын чуулганыг цахим хэлбэрээр явуулах шийдвэрийг УИХ-ын дарга Г.Занданшатар гаргалаа.  Ингэснээр УИХ-ын Тамгын газраас бэлтгэл ажлыг хийж эхэлсэн байна.

Чуулганы нээлтийг 4-5 танхимд зэрэг явуулах, нэгдсэн болон Байнгын хороо, Ажлын хэсгийн хуралдааныг танхимд зохион байгуулахаас гадна гишүүдэд зайнаас оролцох боломж бүрдүүлэхээр ажиллаж байгаа аж. Танхимд хуралдсан тохиолдолд гишүүд хоорондын зайг 2-3 метр байлгах, нэг дор 20-оос илүү гишүүн цуглуулахгүй байхаар зохион байгуулах юм байна. Түүнчлэн гишүүдийн ирц бүртгүүлэх, санал хураалтад цахимаар оролцох нөхцөлийг хангахын тулд УИХ-ын чуулганы хуралдааны Дэгийн тухай хуульд холбогдох өөрчлөлт оруулах асуудлыг ч ярьж байгаа аж.

Энэ асуудлаар УИХ-ын даргын дэргэдэх зөвлөл цахимаар хуралдсан удаатай. Тухайн хуралдаанаар УИХ-ын чуулган, Байнгын хорооны хуралдаан, Ажлын хэсгийн хурал, хэлэлцүүлгийг цахимаар явуулах техникийн боломж, шаардлага, анхаарах асуудлын талаар ярилцсан байна. Хуралдаанаар ажлын хэсгийн хурал болон хэлэлцүүлгийг цахимаар явуулах бүрэн боломжтой ч чуулганы нэгдсэн болон байнгын хорооны хуралдааныг цахимаар явуулснаар УИХ-ын чуулганы хуралдааны Дэгийн тухай хуулийг зөрчих тухай хөндөж байлаа. Учир нь, уг хуульд “УИХ-ын гишүүд саналаа өгөхдөө биеийн давхцахгүй өгөгдөл буюу хурууны хээгээрээ санал өгнө” гэж заасан байдаг аж.  Энэ тухайд УИХ-ын дарга Г.Занданшатар “Туршилтын хурал хийж үзлээ. Техникийн хувьд бүрэн боломжтой нь харагдлаа. Даргын дэргэдэх хурал болон УИХ-ын даргын захирамж гаргах, санал солилцох зэрэг асуудлыг ийм байдлаар хэлэлцэн шийдвэрлэж болох юм байна. Даргын дэргэдэх хуралдааны журамд онлайнаар буюу цахимаар хуралдаж болно гэж заасан байдаг. Цаашид гишүүд энэ программаар харилцаж, асуудлаа ярилцаж байя. Дэгийн тухай хуульд биеийн давхцахгүй өгөгдлөөр ирцэд бүртгүүлэхээр заасан байдаг. Мөн саналаа гараа өргөж өгч болно гэсэн заалт ч бий. Тэгэхээр онлайнаар саналаа өгөх боломж байна. Гэхдээ сайтар судалж, хуульчдын дүгнэлт гаргуулах замаар нэгдсэн ойлголцолд хүрэх талаар бид судалж байгаа”  хэмээжээ.

Дэлхий нийтэд үүсээд буй онцгой нөхцөл байдалтай холбогдуулан дэлхийн улс орны парламентууд ч мөн зохих арга хэмжээг авч эхэлжээ. Тухайлбал, хуралдааны тоогоо багасгах, хойшлуулах, цахимаар хуралдахаар болсон байна. Тодруулбал, Европарламент байршлаа өөрчилж Францын Страсбург хотоос Бельгийн Брюссель рүү шилжиж байгаа бөгөөд энэ сарын 26-нд болох хуралдаанаа зайнаас явуулж, цахим шуудангаар санал хураалт хийхээр шийдвэрлэсэн байна. Мөн ХБНГУ, Австрали, Норвеги, Итали, Их Британи, Голланд, Шинэ Зеланд, Польш, Эстонийн парламент хуульдаа өөрчлөлт оруулж, онцгой нөхцөлд хуралдах шинэ дэг бий болгох, тодорхой хязгаарлалт тогтоох горимоор ажиллаж байгаа бол БНХАУ, Иран, Испани, Франц, Канад, Филиппин, ӨАБНУ зэрэг орнууд хуралдаанаа хойшлуулах буюу түр зогсоогоод байгаа ажээ.